Կախովի առաստաղ

Ինտերիերի դիզայնում առաստաղը կարող է դառնալ տան հիմնական, իսկ երբեմն էլ ՝ միակ դեկորատիվ տարրը: Ժամանակակից ինժեներական և տեխնոլոգիական լուծումները թույլ են տալիս տան ինտերիերի և մասնավորապես առաստաղի դիզայնում իրագործել նույնիսկ ամենահամարձակ գաղափարները։ Այս կոնտեքստում, կախովի առաստաղները դառնում են անփոխարինելի և հաճախ օգտագործվում են ոչ թե ֆունկցիոնալության, այլ դիզայնի համար։

Կախովի առաստաղները լայն տարածում են ստացել համեմատաբար վերջերս՝ 90-ականների սկզբին, և այժմ էլ շարունակում են լինել ամենաարդյունավետ լուծումը: Կախովի առաստաղներն առանձնանում են իրենց բազմազանությամբ, բոլոր տեսակներն էլ կազմված են հատուկ “կմախքից”, որը հատուկ կախոցի միջոցով կցվում է առաստաղի մակերեսին: Թեև մոնտաժման աշխատանքները այնքան էլ բարդ չեն, խորհուրդ ենք տալիս դիմել փորձառու վարպետի, ով կկարողանա գրագետ կատարել չափագրումները և նույնիսկ ամենաբարդ դիզայնով առաստաղի մոնտաժը։ Խորհրդատվության համար կարող եք դիմել varpet հավելվածի մասնագետներին։

Ժամանակակից բնակարանների, առանձնատների և գրասենյակների գերակշիռ մասում տեղադրված են կախովի առաստաղներ: Դրանք գեղեցիկ են, հարմարավետ և ունեն մի շարք առավելություններ սովորական ներկված կամ պաստառապատ առաստաղների համեմատ:

Կախովի առաստաղների հիմնական առավելությունները

• Մոնտաժման աշխատանքները կարելի է սկսել առանց նախապատրաստելու առաստաղի մակերեսը։
• Կախովի առաստաղի տակ կարող եք թաքցնել էլեկտրալարերը և տեսանելի անցանկալի այլ տարրեր։
• Մեկ ջահի փոխարեն կախովի առաստաղը թույլ է տալիս տեղադրել մի քանի լամպեր՝ ըստ անհրաժեշտության և նախասիրության։
• Ժամանակի ընթացքում առաստաղի գույնը չի խամրում։
• Ջրի արտահոսքի ժամանակ կախովի առաստաղի ջրակայուն հիմքը կպաշտպանի տարածքը։
• Առաստաղի տեղադրումը կարող է իրականացվել վերանորոգման ցանկացած փուլում և նույնիսկ այն ավարտելուց հետո:
• Ծածկույթը կարող է բազմիցս տեղադրվել և ապամոնտաժվել, այն չի կորցնի իր հատկությունները:

Կախովի առաստաղների գլխավոր թերությունն այն է, որ տեղադրվելուց հետո սենյակի բարձրությունը կնվազի 5-15 սմ-ով, ինչը անցանկալի է, եթե առաստաղը երկուսուկես մետրից պակաս է:

Կախովի առաստաղի տեսակները։ Ինչպես կատարել ճիշտ ընտրություն

Գոյություն ունեն կախովի առաստաղների բազմաթիվ տեսակներ՝ նախատեսված բնակարանի տարբեր հատվածների, գրասենյակային տարածքների և արտադրական տարածքների համար։

Գիպսակարտոնե կախովի առաստաղներ

Գիպսակարտոնե առաստաղն իրենից ներկայացնում է հաստ երկշերտ ստվարաթուղթ և գիպս՝ շերտերի միջև։ Գիպսակարտոնի միջոցով կարելի է ստանալ մակերևույթ կամ ցանկացած այլ դիզայն-լուծումներ՝ կոր գծերով, ելուստներով և խորշերով։

Գիպսակարտոնե կախովի առաստաղներ կարող են տեղադրվել ինչպես չոր, այնպես էլ խոնավ և մասնագիտացված սենյակներում: Կախված տարածքից՝ կարելի է ընտրել գիպսակարտոնե առաստաղի հետևյալ հումքերից մեկը․

• ստանդարտ նյութ
• խոնավադիմացկուն - սիլիկոնային հավելումով, որն օգտագործվում է խոհանոցի, լոգարանի և սանհանգույցի համար
• հրդեհակայուն - ապակեթելային հավելումներով, որոնք հարմար են այն տարածքների համար, որտեղ բարձր է հրդեհի վտանգը
• հատուկ ներծծմամբ, որը և՛ հրդեհակայուն է, և՛ պաշտպանում է խոնավությունից
• ճկուն՝ դիզայնի համար

Գիպսակարտոնը չի պարունակում վնասակար խառնուրդներ, ապահովում է անհրաժեշտ միկրոկլիմա, ինչպես նաև ունի հիանալի ջերմային և ձայնամեկուսիչ հատկություններ: Մեկ շերտի քաշը 15 կգ է:

Նյութն ինքնին բավականին փխրուն է և տեղադրման ընթացքում պահանջում է հատուկ հմտություններ։ Մոնտաժման աշխատանքներին մասնակցում են առնվազն երեք հոգի։ Խորհուրդ ենք տալիս հումքը չփչացնելու և ավելորդ ծախսերից խուսափելու համար դիմել մասնագետի։ Հիմնական տեղադրման աշխատանքներն ավարտելուց հետո գիպսակարտոնի շերտը ծածկվում է ծեփամածիկով, հիմնաներկով և ներկով: Յուրաքանչյուր փուլ տևում է մի քանի օր, քանի որ պետք է սպասել մինչև այն ամբողջովին չորանա:

Կարդացեք նաև՝ Գիպսակարտոնե առաստաղներ․ ինչո՞ւ են ամենատարածվածը շուկայում

Մոդուլային կախովի առաստաղներ

Մոդուլային առաստաղը կազմված է կարկասի առանձին տարրերից, որոնց վրա տեղադրվում է առաստաղը։ Ամենատարածված տեսակներից են սալիկային, ձողային, Արմսթրոնգ (Armstrong) և Գրիլյատո (Griliato):

Սալիկային կախովի առաստաղներ

Սալիկային կախովի առաստաղը պատկանում է կախովի առաստաղների նոր սերնդին: Այն բաղկացած է շրջանակից (մետաղյա կարկաս) և փափուկ կամ կոշտ հանքային մանրաթելերից պատրաստված սալիկներից (1.5 սմ հաստությամբ, 60х60սմ կամ 61x61 սմ): Մոդուլային ցանցն իր հերթին բաղկացած է միմյանց T-ձև բջիջներից, որոնց մեջ էլ տեղադրվում են սալիկները։ Անհրաժեշտության դեպքում սալիկները հեշտությամբ կարելի է հանել և փոխարինել:

Սալիկները կարող են լինել մի քանի տեսակի

• Մետաղական՝ ցինկապատ պողպատից կամ ալյումինից
• Հայելային՝ սիլիկատային կամ ակրիլային ապակուց, ունեն փայլուն կամ անփայլ մակերես
• Գիպսից՝ առաջարկվում է տարբեր երանգներով, որոնք հարմար են ցածր խոնավությամբ սենյակների համար, օժտված են աղմուկա և ջերմամեկուսիչ հատկություններով
• Ապակյա՝ պատրաստված նույն հումքից, ինչ հայելային սալիկները, բայց ունեն թափանցիկություն: Սալիկների տակ տեղադրված լուսավորության շնորհիվ լույսը լինում է ցրված
• Հանքային կամ ապակե մանրաթելից
• Փայտյա՝ էլիտար բամբուկից, տիկից, սեղմված փայտից: Բավականին թանկարժեք հումք, որն ընտրվում է բացառապես հատուկ ինտերիերի դիզայներական լուծումներում։

Ալյումինե կախովի առաստաղներ

Ալյումինե կախովի առաստաղը ներդաշնակ կլինի ցանկացած ոճի և ցանկացած չափի տարածքների համար։ Այն տեսողական մեծացնում է տարածությունը, ավելացնում լուսավորությունը, հրակայուն և ջրակայուն է։ Ալյումինը տարբերվում է իր դիմացկունությամբ, չի փոշոտվում, չի պահանջում լրացուցիչ խնամք և միշտ թարմ տեսք ունի։ Թեթև քաշը (մինչև 2կգ/1մ2) թույլ չի տալիս կարկասի դեֆորմացում։ Օգտագործման ժամկետն անսահմանափակ է:

Կիրառվում են ալյումինե կախովի առաստաղների հետևալ տեսակները՝ Գրիլյատո։ Համակարգը բաղկացած է (ոչ շարժական) ալյումինե սալերից (U-ձև, 3-5 սմ բարձրությամբ, 0,5-1 սմ հաստությամբ), որոնք վանդակաճաղ են կազմում: Սալիկները կարող են լինել տարբեր գույների` ոսկեզօծ, քրոմ, կապույտ, սպիտակ, պղնձագույն, արծաթագույն և այլն: Համադրելով տարբեր բարձրության սալիկներ՝ կարելի է ստանալ շատ հետաքրքիր վիզուալ էֆեկտներով դիզայն։

Կախովի առաստաղի թափանցիկությունը կախված է բջիջների չափից (3x3-ից 20x20 սմ), առաստաղից ունեցած հեռավորությունից և լույսի քանակից․ որքան բարձր է առաստաղը, այնքան մեծ պետք է լինեն բջիջները:

Ձողային։ Այս տեսակի կախովի առաստաղը պատրաստված է 3-4 մետր երկարությամբ և 5-20սմ լայնությամբ սալիկներից (մեծ տարածքների համար մինչև 6մ և ավելի երկար առաստաղները պատվիրվում են առանձին)։

Ձողային կախովի առաստաղները կարող են լինել ալյումինե, մետաղական և պլաստիկ։ Ամենատարածված ու լայն կիրառում ունեն պլաստիկ կախովի առաստաղները։ Խոնավադիմացկունության շնորհիվ առավել հարմար են բարձր խոնավություն ունեցող տարածքների համար։

Արմսթրոնգ կախովի առաստաղներ

Անգլիական Armstrong տեսակի կախովի առաստաղները լայն կիրառում ունեն ամբողջ աշխարհում։ Պատրաստվում են բնական, էկոլոգիապես մաքուր հանքային սալիկներից:

Վնասակար խառնուրդների բացակայությունը թույլ է տալիս դրանք օգտագործել ցանկացած սենյակում և տարածքում։ Armstrong տեսակի առաստաղի տեղադրումը նման է ցանկացած մոդուլային կախովի առաստաղի մոնտաժմանը․ սալիկները տեղադրվում են երկաթե պրոֆիլների վրա: Սալիկներն իրար միակցված չեն, ինչը նշանակում է՝ անհրաժեշտության դեպքում հնարավոր է հեռացնել թեկուզ մեկ սալիկ։

Armstrong տեսակի կախովի առաստաղները խորհուրդ չի տրվում տեղադրել լոգարանում կամ ջեռուցման սարքերի վրա։ Խոնավության և ջերմաստիճանի տատանումները կարող են ազդել ծածկույթի գույնի վրա:

Նման բազմազանության մեջ շատ դժվար է կատարել ճիշտ ընտրություն։ Եթե չեք կողմնորոշվում՝ ո՞ր տեսակն է առավել համապատասխանում ձեր բնակարանի, գրասենյակի կամ այլ տարածքի համար, կարող եք խորհրդակցել Varpet-ի հմուտ մասնագետների հետ։

Ինչպիսի՞ կախովի առաստաղ ընտրել տան համար։ Շնորհիվ դիզայնի լայն հնարավորության՝ գիպսակարտոնե կախովի առաստաղները կարող են օգտագործվել բնակարանի կամ առանձնատան գրեթե բոլոր սենյակներում։ Այն թույլ է տալիս կոտրել հարթ մակերեսը, վիզուալ բաժանել սենյակը հատվածների, տալ լուսային և գունային լուծումներ՝ որպես ինտերիերի կատարյալ լրացում։

Գիպսակարտոնե առաստաղները, նույնիկ խոնավադիմացկուն տեսակները, այնքան էլ հարմար չեն բարձր խոնավություն ունեցող տարածքների համար, օրինակ՝ լոգարան, սանհանգույց։ Խոնավություն ունեցող տարածքներում օգտնագործվում են այլ տեսակի կախովի առաստաղներ՝ պլաստիկ ձողային և սալիկային։ Երկու տարբերակն էլ ունի դիզայնի և գույնի ընտրության լայն հնարավորություն։ Այս երկու տեսակներն էլ դիմացկուն են և կծառայեն շատ երկար։

Ինչպիսի՞ կախովի առաստաղ ընտրել գրասենյակի համար: Գրասենյակի կամ այլ հանրային տարածքների հարդարումը և ինտերիերը տարբերվում են բնակարանի կամ առանձնատան հարդարումից թե՛ դիզայնով, թե՛ պահանջներով։ Մեծ տարածքների համար առավել արդյունավետ են սալիկային ալյումինե կախովի առաստաղները՝ Գրիլյատո, Արմսթրոնգ, ալյումինե կամ մետաղական ձողային առաստաղները։ Այս տեսակները ոչ միայն էսթետիկ են, այլ նաև երկարակյաց, կարող են տեղադրվել բարձր խոնավության հրդեհավտանգ տարածքներում, չեն դեֆորմացվում և չեն պահանջում հատուկ խնամք։

Արտադրական տարածքների, սուպերմարկետների և նմանատիպ շինությունների համար նախընտրելի են մինիմալիստական մոդուլային կախովի առաստաղները, որոնք կծառայեն երկար և չեն վնասվի։